Fisioterapia no embarazo e posparto en Arteixo
É moi conveniente que a muller se prepare física e emocionalmente tanto para o seu embarazo como para o nacemento do seu bebé e o puerperio ou posparto. Antes da xestación do teu fill@, recoméndase tonificar moi ben o chan pélvico, a faixa abdominal e a musculatura das túas costas, así o teu organismo non acusará apenas os cambios futuros durante o embarazo e estará ben forte para o nacemento do teu bebé.
Durante a feliz espera e a partir da semana 12 de xestación poden realizarse sesións individuais e/ou coa parella para abordar distintos aspectos como poden ser: a alimentación, técnicas de relaxación e/ou alivio de molestias músculo-esqueléticas, técnicas respiratorias, masaxe perineal... Tamén realizamos clases individuais ou grupais de exercicios terapéuticos, co obxectivo de mellorar a mobilidade global corporal e específica da pelve e columna lumbar, fortalecer musculatura do compartimento abdominopélvico, membros superiores e inferiores... Para así mellorar o estado de saúde xeral da muller e do bebé. Isto favorecerá tamén o proceso (contraccións, dilatación, expulsivo, nacemento e alumeamento) ao que se verá sometido o corpo da muller e do bebé no momento do nacemento deste.
Unha vez xa no posparto, a fisioterapia encamíñase a recuperar ben unha posible cicatriz, recuperar o ton e a forza da musculatura do chan pélvico, a faixa abdominal e das costas ademais de recuperar a postura da muller. A recuperación posparto realízase co obxectivo de evitar os problemas de incontinencia urinaria, feces e/ou gases, frear o descenso dos órganos pélvicos, previr a aparición de dores lumbares, dorsais cervicais, de cadeira, varices, hemorroides, estrinximento...